Mae Techniquest yn ganolfan darganfod gwyddoniaeth flaenllaw sydd ag enw da yn fyd-eang am ragoriaeth ac arloesedd.
Dyma gyfnod cyffrous i ymuno â’n tîm. Rydyn ni newydd weddnewid Techniquest, ac mae’n gartref i gynulleidfaoedd o bob oed ymwneud â phynciau STEM (gwyddoniaeth, technoleg, peirianneg a mathemateg).
Gallwch ddarganfod mwy am ein gweledigaeth yn ein strategaeth, a dilynwch y dolenni isod i weld ein:
Gweler isod restr o swyddi gwag presennol a sut i ymgeisio.
Rheolwr Marchnata ac Ymgyrchoedd
- Swydd: Amser Llawn (bydd angen gweithio ar benwythnosau a gyda’r nos yn achlysurol fel rhan o’r swydd) / Gweithio hybrid yn bosib
- Cyflog: £32,000–£35,000 yn dibynnu ar brofiad
- Dyddiad cau: Dydd Sul 6 Ebrill 2025
Rydyn ni’n chwilio am weithiwr marchnata proffesiynol deinamig a brwdfrydig i ymuno â’n tîm, fydd yn gallu mynd â’n hymgyrchoedd i’r lefel nesaf. Byddwch yn angerddol ac yn wybodus am farchnata, a byddwch yn rhagori o ran llunio, gweithredu a gwerthuso ymgyrchoedd marchnata effeithiol sy’n gyrru gwerthiant, yn ennyn diddordeb cynulleidfaoedd newydd ac yn hyrwyddo profiadau cadarnhaol i ymwelwyr.
Fel ein Rheolwr Marchnata ac Ymgyrchoedd, byddwch yn chwarae rhan ganolog yn y gwaith o godi proffil Techniquest, cynyddu nifer yr ymwelwyr a chefnogi gwaith creu incwm ar draws holl feysydd gwaith y sefydliad: gan gynnwys gwerthu tocynnau, digwyddiadau a llogi ystafelloedd. Mae hon yn swydd ymarferol lle byddwch yn gyfrifol am ddatblygu a gweithredu ymgyrchoedd marchnata integredig, fydd yn cwmpasu dulliau digidol a thraddodiadol, hysbysebu, print, cyfryngau cymdeithasol organig a drwy dalu i hyrwyddo, cysylltiadau cyhoeddus, marchnata uniongyrchol a mwy.
Byddwch yn gyfarwydd â defnyddio data a dealltwriaeth o’r gynulleidfa i lywio’ch penderfyniadau marchnata, gan sicrhau bod yr ymgyrchoedd yn seiliedig ar dystiolaeth ac yn darparu canlyniadau mesuradwy. Byddwch hefyd yn fedrus o ran ysgrifennu copi creadigol ac adrodd straeon, gyda dealltwriaeth gref o gysondeb brand a thôn llais.
Byddwch eisoes wedi gweithio mewn amgylchedd lle mae’r cwsmer yn ganolog i’ch dull o farchnata; yn ddelfrydol, naill ai mewn canolfan darganfod gwyddoniaeth, atyniad ymwelwyr, canolfan addysg neu sefydliad diwylliannol. Dim ots a oedd y cynulleidfaoedd dan sylw’n mynd i’r theatr, i gyngherddau neu i gasgliadau wedi’u curadu mewn amgueddfa, y peth allweddol yw eich bod eisoes yn deall yr egwyddor bod angen i’r ymwelydd fod wrth galon popeth rydyn ni’n ei wneud.
Bydd sgiliau rheoli prosiect rhagorol yn hanfodol, gan y byddwch yn gweithio ar sawl ymgyrch gyda nifer o derfynau amser ar yr un pryd, mewn amgylchedd lle mae pethau’n symud yn gyflym. Byddwch yn deall yr angen am gyflymdra i ymateb i gyfleoedd annisgwyl yn ogystal â dal ati i weithio drwy weithgareddau sydd wedi’u cynllunio ymlaen llaw, er mwyn cyrraedd y gynulleidfa ehangaf bosib.
Os yw hyn yn swnio fel rhywbeth sydd o ddiddordeb i chi, darllenwch y disgrifiad o’r swydd isod i gael gwybod mwy:
Os oes gennyt ti unrhyw gwestiynau penodol, peidiwch ag oedi i e-bostio ni.
Rheolwr ar Ddyletswydd
- Swydd: Amser llawn — o ddydd Mercher tan ddydd Sul ond gyda’r hyblygrwydd i sicrhau ein bod yn gallu gweithredu dros saith diwrnod
- Cyflog: £27,000
- Dyddiad cau: 5pm dydd Sul 20 Ebrill 2025
Ydych chi’n hoff o bobl ac yn mwynhau gweithio mewn amgylchedd sy’n wynebu cwsmeriaid? Ydych chi’n ymhyfrydu yn yr her o gael y gorau o bob aelod o’r timau o dan eich gofal? Ydych chi’n gyfathrebwr da gyda sgiliau trefnu cryf?
Rydyn ni’n chwilio am rywun sydd â hynny i gyd a mwy, a fyddai’n mwynhau bod yn rhan o dîm bach sy’n benderfynol o ddarparu profiad eithriadol i gwsmeriaid bob tro.
Techniquest, sydd wedi’i lleoli ar lan y dŵr ym Mae Caerdydd, yw’r Ganolfan Darganfod Gwyddoniaeth bwrpasol fwyaf hirsefydlog yng ngwledydd Prydain. Rydyn ni’n frwd dros ysbrydoli chwilfrydedd drwy Wyddoniaeth, Technoleg, Peirianneg, y Celfyddydau a Mathemateg (STEAM) ac rydyn ni’n croesawu dros 160,000 o ymwelwyr bob blwyddyn — cymysgedd o deuluoedd, ysgolion, oedolion annibynnol, grwpiau a chleientiaid corfforaethol.
Fel elusen addysgol ac atyniad poblogaidd i ymwelwyr, ein nod yw sicrhau bod ein holl ymwelwyr yn cael yr amser gorau posib gyda ni. Mae rhan annatod o’r profiad yna’n cael ei ddarparu gan ein timau blaen tŷ a’n cyflwynwyr gwyddoniaeth byw, ac mae angen iddyn nhw gynnig croeso cynnes a phrofiad diogel a di-drafferth i’n gwesteion, ac ymwneud yn rhagweithiol â’n holl gwsmeriaid: gan helpu i ddod â gwyddoniaeth yn fyw i bawb sy’n ymweld.
Fel Rheolwr ar Ddyletswydd, byddwch yn gyfrifol am oruchwylio’r timau a gwneud yn siŵr bod pawb yn cyrraedd safon gyson uchel o ran ymgysylltu â’n holl ymwelwyr.
Byddwch yn canolbwyntio ar y cwsmer ac yn mwynhau ymwneud â phobl ar eu gorau — a bydd gennych brofiad o ymwneud â nhw ar eu gwaethaf hefyd. Byddwch yn deall sut i reoli a thawelu sefyllfaoedd anodd, sut i ysbrydoli’ch tîm i fod ar eu gorau yn gyson, yn ogystal â bod yn hyderus wrth reoli logisteg, iechyd a diogelwch, a gweithrediadau blaen tŷ cyffredinol.
Byddwch yn angerddol am gyfathrebu gwyddoniaeth a thechnoleg, gyda safon uchel o sgiliau cyfathrebu ysgrifenedig a llafar. Bydd gennych hefyd safon dda o addysg, gyda chymhwyster TGAU mewn Mathemateg a Saesneg ar Radd C neu uwch, a dealltwriaeth gadarn o weithio mewn atyniad i ymwelwyr. Bydd sgiliau arwain tîm a rheoli pobl ymhlith eich cryfderau mawr, ochr yn ochr â sgiliau trefnu rhagorol a sylw gofalus i fanylion.
Dyma flas o’r hyn rydyn ni’n ei wneud:
- Cartref i dros 120 o arddangosion rhyngweithiol
- Llwyfannu sioeau gwyddoniaeth byw yn ein Theatr Wyddoniaeth bwrpasol
- Cynnal Teithiau Sêr yn ein Planetariwm 360° clyd
- Cyflwyno gweithdai ymarferol yn Labordy KLA
- Trefnu digwyddiadau arbennig gan gynnwys: Dyddiau Plant Bach, Dyddiau Addysgwyr Cartref, a Sesiynau Hamddenol ar fore dydd Sul
- Cynnal digwyddiadau ‘dim ond i oedolion’ gan gynnwys: digwyddiadau gyda’r nos i oedolion, digwyddiadau ar ôl oriau, a phrynhawniau’r Caffi Gwyddoniaeth
- Cyflwyno gweithgareddau Allgymorth ac Ymgysylltu i gymunedau lleol
- Trefnu Prosiectau Addysg ar gyfer ystod eang o ysgolion
A llawer mwy!
Fel sefydliad cynhwysol, rydyn ni wedi ymrwymo i gyfle cyfartal ac i feithrin amgylchedd gwaith cadarnhaol. Felly beth ydyn ni’n ei gynnig? Dyma gipolwg:
- 25 diwrnod o wyliau blynyddol a Gwyliau Banc ar ben hynny
- Diwrnod lles ychwanegol
- Diwrnod i ffwrdd ar gyfer eich pen-blwydd
- Deg tocyn am ddim bob blwyddyn i ffrindiau a theulu gael ymweld
- Cynllun talebau gofal plant
- Cynllun beicio i’r gwaith
- Mynediad at Raglen Cymorth i Weithwyr
- Amgylchedd tîm bach, cefnogol
- Cyfle i weithio mewn amgylchedd ysbrydoledig a chreadigol
Os yw hyn yn swnio fel rhywbeth sydd o ddiddordeb i chi, darllenwch y disgrifiad o’r swydd isod i gael gwybod mwy:
Os oes gennyt ti unrhyw gwestiynau penodol, peidiwch ag oedi i e-bostio ni.
Gweler ein Polisi Preifatrwydd Recriwtio.